Türkmenistanyň Prezidenti ýaşlaryň ylmy işler boýunça bäsleşiginiň ýeňijileri baradaky Karara gol çekdi
Şu gün Prezident Serdar Berdimuhamedow sanly ulgam arkaly 5 aýyň jemine bagyşlanan Hökümet mejlisini geçirdi. Onda degişli döwürde ykdysadyýetiň pudaklarynda alnyp barlan işleriň jemleri jemlenilip, resminamalaryň taýýarlanan taslamalaryna-da garaldy we döwlet durmuşynyň käbir meseleleri ara alnyp maslahatlaşyldy.
Mejlisiň barşynda wise-premýer N.Amannepesow hasabatynyň çäklerinde Türkmenistanyň ýaşlarynyň arasynda ylmy işler boýunça geçirilen bäsleşigiň jemleri barada aýtdy we Prezident Serdar Berdimuhamedowyň garamagyna degişli Kararyň taslamasyny hödürledi.
Döwlet Baştutany hasabaty diňläp, degişli Karara gol çekdi hem-de resminamany sanly ulgam arkaly wise-premýere iberip, bu ugurda alnyp barylýan işleri yzygiderli gözegçilikde saklamagy tabşyrdy. Bu barada «Watan» habarlar gepleşiginde habar berildi.
